श्रीक्षेत्र माळेगाव यात्रेसाठी आरोग्य विभाग सज्ज; जिल्हा आरोग्य अधिकारी डॉ. संगीता देशमुख यांच्याकडून चोख नियोजन

महाराष्ट्रातील प्रसिद्ध असलेल्या श्रीक्षेत्र माळेगाव यात्रेच्या पार्श्वभूमीवर भाविकांच्या आरोग्याची काळजी घेण्यासाठी जिल्हा आरोग्य विभागाने जय्यत तयारी केली आहे. जिल्हाधिकारी राहुल कर्डिले आणि मुख्य कार्यकारी अधिकारी मेघना कावली यांच्या मार्गदर्शनाखाली, जिल्हा आरोग्य अधिकारी डॉ. संगीता देशमुख यांनी यात्रेसाठी सर्वसमावेशक आरोग्य आराखडा तयार केला आहे.
लाखो भाविकांची उपस्थिती असलेल्या या यात्रेसाठी दिनांक १६/१२/२०२५ ते २४/१२/२५ या कालावधीत आरोग्य सेवा कार्यान्वित राहतील.
भव्य आरोग्य प्रदर्शन आणि जनजागृती
यात्रेमध्ये केवळ उपचारच नव्हे, तर जनजागृतीवरही भर देण्यात आला आहे. शासनाच्या विविध आरोग्य योजना आणि राष्ट्रीय कार्यक्रमांची माहिती सर्वसामान्यांपर्यंत पोहोचवण्यासाठी भव्य आरोग्य प्रदर्शनी स्टॉल उभारण्यात येत आहेत. यामध्ये विविध आजार, त्यांचे प्रतिबंधात्मक उपाय आणि सरकारी योजनांची माहिती नागरिकांना दिली जाणार आहे.
आरोग्य नियोजनाची ठळक वैशिष्ट्ये:
* आरोग्य शिबिर: यात्रेकरूंच्या तातडीच्या उपचारासाठी विशेष आरोग्य शिबिरांचे आयोजन.
* मोठ्या प्रमाणात मनुष्यबळ: वैद्यकीय अधिकारी, आरोग्य सेवक, आरोग्य सहाय्यक आणि परिचर अशा एकूण १४७ कर्मचारी व अधिकाऱ्यांची यात्रेसाठी नियुक्ती करण्यात आली आहे.
* रुग्णवाहिका सेवा: तातडीच्या मदतीसाठी १०२ आणि १०८ रुग्णवाहिकांसह मोबाईल मेडिकल टीम (भ्रमणती पथके) तैनात करण्यात आली आहेत.
* स्वच्छता व पाणी तपासणी: यात्रेच्या परिसरात पाणीपुरवठा स्रोतांची नियमित तपासणी आणि स्वच्छता राखण्यासाठी विशेष पथके कार्यरत राहतील.
* तज्ज्ञ देखरेख: जिल्हास्तरीय आणि तालुकास्तरीय वरिष्ठ अधिकारी संपूर्ण यात्रेवर २४ तास लक्ष ठेवून राहणार आहेत.
माळेगाव यात्रा ही राज्याची अस्मिता असून, येथे येणाऱ्या प्रत्येक भाविकाला उत्तम आरोग्य सेवा मिळावी आणि आरोग्य प्रदर्शनीच्या माध्यमातून शासनाच्या योजनांची माहिती तळागाळापर्यंत पोहचावी, हा या नियोजनाचा मुख्य उद्देश आहे.